На "Мінск-Арэне" стартаваў Кубак наймацнейшых спартсменаў па канькабежным спорце з удзелам лепшых беларускіх і расійскіх атлетаў.
Спаборніцкую праграму турніру адкрылі забегі на дыстанцыі 500 м у жанчын, на старт якіх выйшлі па шэсць прадстаўніц Беларусі і Расіі. Залаты медаль заваявала наймацнейшая расійская спрынтарка Дар'я Качанава, якая паказала час 37,69 сек. Другое месца з вынікам 38,21 сек. заняла лідэр беларускай спрынтарскай каманды Ганна Дамарацкая, тройку замкнула Ангеліна Голікава (38,89 сек.)
Услед за дзяўчатамі на старт дыстанцыі 500 м выйшлі мужчыны. Лідэр нашай нацыянальнай каманды Ігнат Галавацюк паказаў вынік 35,36 сек. і стаў уладальнікам срэбра.
Першае золата беларускай камандзе прынесла Марына Зуева. У жаночых спаборніцтвах на дыстанцыі 3000 м беларуска бегла ў апошняй пятай пары разам з расіянкай Аляксандрай Саюцінай. Зуева паказала вынік 4 мін. 08,84 сек. і стала ўладальніцай золата.
На дыстанцыі 5000 м у мужчын лідэр нашай каманды стаераў Ягор Дамарацкі ў наймацнейшай пары ўпэўнена апярэдзіў расіяніна Максіма Андрушына і паказаў лепшы вынік сярод шасці ўдзельнікаў - 6 мін. 40,95 сек.
Праграму першага дня спаборніцтваў завяршалі камандныя спрынты. Лепшы час у дзяўчат паказаў беларускае трыо ў складзе Ганны Дамарацкай, Кацярыны Гагіевай і Сафіі Татурэвіч (1 мін 29,25 сек). У мужчын каманда Беларусь-2, за якую беглі Яўген Гагіеў, Уладзіслаў Гапон і Уладзіслаў Запойкін, заняла другое месца з вынікам 1 мін 23,04 сек, уступіўшы секунду асноўнай расійскай тройцы.
Па матэрыялах БЕЛТА
